سؤال لاصحاب الدورانجو .

تاكد من رقم الشاص اللي مسجل في الاستمارة مع السيارة 
لقاهم مركبين لوحات ثانية غير اللي باسمك 
تاكد من رقم الشاصي 

وكيل كرايسلر ودودج وجيب واحد 


ممكن عشان كذا ما فرقوا 

جميع السيارات التابعة للشركة المتحدة للسيارات , مسجل في البطاقة الجمركية ماركة المركبة (كرايسلر) نسبة إلى الشركة الأم كرايسلر

وبدأت في هذا المجال من عام 1914 حتى 1925 تحت اسم دودج ومن عام 1998 حتى 2008 تحت اسم مستقل وهو كرايسلر وقبل عام 1998 كانت شركة كرايسلر تتبع شركة الديملر الألمانية تحت اسم ديملر كرايسلر اج وفي عام 2007 وبتحديد 14/مايو باعت ديملر كرايسلر اج 81% من حصتها كأسهم الي شركة سيربيروس الأمريكية ومع ذلك لا زالت الشركة الألمانية ديملر تملك حصة 19.9% من الاسهم في كرايسلر وبعد ربح شركة Cerberus الملكية الكاملة لشركة كرايسلر أو كرايسلر الجديدة

شكرا لكم جميعا 
الحين تطمنت ان كل شئ سليم .

احد عنده علم عن الكشافات ؟

اهم ماعليك رقم الشاصي اللي مسجل في الاستمارة مطابق للي في الموتر دق سلفك وتوكل على الله

بالنسبة لكشافات الضباب ما ادري بصراحة ما قد ركبت دورانجو لكن دور في عصا النور يمكن تفره وتشتغل الكشافات اذا كان فيه علامة كشاف

او اذا كان نظام مفتاح مثل الفكتوريا والماركيز يمكن تسحب المفتاح على ورا وتشتغل ، بصراحة هذا كله مجرد تخمين لكن لو تصور لنا الديكور او من جهة الطارة ممكن نفيدك

تقبل مروري

الكشافات تشتغل بالمفتاح اللي على اليسار حق الأنوار اسحب لبرى شوي تشتغل الكشافات 


الله يعطيك خيرها ويكفيك شرها 

مبروك ياصاحب السيارة والله يطعمك خيرها ويكفيك شرها.
اذا فتحت باب السواق بتلقى عليه ستكر مكتوب عليه كرايسلر ولاتستبعد في الموديلا الجاية تلقى عليه فيات لان شركة فيات الايطالية اشترت شركة كرايزلر وجميع سيارات دوودج وجيب ملك لشركة كرايزلر مثل شركة تويوتا تمتلك لكزس وديهاتسو

الله يكثر خيركم 
الصراحة ماجربت اني اسحب الزر علی برا .
ومشكورين علی الردود السريعة 

انا طلعت دورانجو 2014 

وفي الاستمارة دودج 

سؤال وش الفئة الي طلعتها ؟

الفئة Sxt دفع رباعي لون ابيض

وعليكم السلام ورحمه الله
الله يباركلك فيما رزقك ويعطيك خيره ويكفيك والمسلمين شره

انا والله ماودي اضيق صدرك وودي تتأكد من السيارة
انا عندي دورانجو 13 اخذته وكاله الحمدلله السيارة ماعليها كلام ولا اي ملاحظات ولله الحمد
قبل كم شهر ولد اختي شاري جهاز فحص البدي وبالصدفه مشى على سيارتي وتفاجأت قالي سيارتك مرشوشه
ما اخذت كلآمه على نحو جدي وقلت جهازك كلبي ومضروب لكن الموضوع بيني وبينك صار يآكل ويشرب معي ما ارتحت
خصوصاً اني متابع لأكثرمن حاله على اليوتيوب ناس تشتكي من المتحده 
رحت بعد اسبوع تقريباً لمحل فحص سيارات معروف ومشهور بالرياض أكد لي البدي كامل عليه لكر وباب السائق مرشوش بدون سمكرة
طلعت ورحت محل ثاني وللأسف نفس الكلآم 
راسلت التجارة وخلال 20 دقيقة اتصلوا علي ماقصروا وشالوني انا وموضوعي فوق لحد ما ابلغتهم ان السيارة اجار منتهي بالتملك
قالوا هنا ما نقدرنسوي شي اذا ما تملك السيارة وفي مثل حالتك راجع مؤوسسة النقد ومؤوسسة النقد ارسلتني لنفس البنك اللي اخذت منه السيارة
رحت للبنك قالوا والله ماندري وش الاجراء المتبع في مثل حالتك ولا قد مر علينا هالشي عموماً رح للوكيل وشف وش يقول
رحت للوكيل قالي من تحت الطاولة انت مالك علاقه كلم مؤوسسة النقد هم بيدهم الحل والربط
رجعت للتجارة قالوا موضوعك بما انك ماتملك السيارة بيطول لكن الحل تسدد السيارة وتنقلها بأسمك وتجيب لنا برنت من المرور يفيد بأن السيارة ماتسجل عليها حوادث ولا سبق ان تم استخراج ورقة اصلاح لها
وإحنا نوعدك خلال 3 اسابيع نجتمع بك مع مندوب الوكيل وما تطلع الا بتعويض متفق عليه انت وهو يا يعوضونك بالبديل او تستلم فلوسك كاش

المعذرة اني طولت بسرد التفاصيل
ولا ودي والله ان اضايقك او افتح لك مجال بالشك بسيارتك وان شاء الله ما تواجه لا انت ولا من يقرأ مثل ما واجهت
لكن قدر الله وما شاء فعل والان ان شاء الله خلال هالاسبوعين بسدد كاش وبرجع للتجارة برفع الشكوى من جديد
وحسبنا الله ونعم الوكيل

حاول قبل استلام السيارة تفحص البدي اذا امكن
واذا تم الاستلآم افحص عند محل ثقه وتأكد بما إنو تاريخ استلام السيارة قريب
موفق خير

افا عليك بس . هذي ماتمشي علي يارجال ماستلمت السيارة الى لما كشفت عليها بجهاز كاشف السمكرة حتى الموظف قام يضحك قلتله اضحك الى بكرة اهم شئ اني اتطمن ويرتاح بالي .
حتى لدرجة اني اكشف بالجهاز كل (شبر) على البودي .
والله يعينك ويقويك عليهم ويرجع لك حقك كامل .