أضف سؤال أو موضوع جديد          

تجربة توفير الوقود للتشارجر

up 10 down 5
أبو بانا 307
قبل 6 شهر



السلام عليكم

تحية طيبة لجميع أعضاء المنتدى..

موضوعي اليوم هو عن سيارات ال٨ سلندر الحديثة وخاصة التشارجر، كثير شباب يسألون عن موضوع البنزين وكيف صرفيته وأن التشارجر يصرف والعالم صايره ماتسمع الا بال٤ سلندر وهو اوفر واقتصادي ومن هالكلام..

وكلام الأعضاء صحيح إن ال٤ سلندر اقتصادي بس هل هو فعلا يوفر اكثر من الثمانية؟ وهل ال ٨ سلندر ممكن يكون اقتصادي ويوفر اكثر من ال٤ سلندر هنا السؤال؟

طبعا بعيدا عن الجدال العقيم والنظريات والفلسفة خلونا ناخذ تجربة فعليا بالشواهد!

عندي تشارجر ٥.٧ موديل حديث ومع ارتفاع البنزين لا حظت انه يمشيني حدود (٤٥٠ ل٥٢٠ كيلو) داخل المدينه و(٥٦٠ ل ٦٢٠ كيلو) خط سفر!

ولا اخفيكم تضايقت من صرفيته داخل البلد وبنفس الوقت قلت لازم اشوفله حل!

طبعا كلكم يعرف ان السيارات الجديدة فيها نظام الآڤرج لتر لكل ١٠٠ كيلو L/100 km، ولما شيكت عليه لقيته 13.1 ومره 12.5 واحيانا يوصل ل 11.6 وقعدت اراقبه بتنقلاتي ولقيته شوي ينزل وشوي يرتفع في هذا المعدل.

سألت نفسي ليش ما احاول انزله اكثر وحاولت ولاقدرت، بعدين قلت هو اصلا ليش يرتفع؟ وش السبب؟

لقيت عوامل كثير تندرج تحت شيئين:

- طريقة القيادة (و هذا شي بيدك)
- كثرة التوقفات والزحمة ( وهذا شي خارج عن ارادتك)

لقيت أشياء أنا اساهم فيها سببت هالشيء :

- كثرة جلستي بالموتر وهو شغال وواقف
- دخولي لأماكن الزحام والاختصار من الحواري
- احاول اني اسبق احد غيري على لفه او مخرج سرعته مساويه لي
- ما اعطي مجال للسياره انها تتسارع ببطء
- ما استخدم الدايري كثير واكتفي بطرق رئيسيه كبيرة وللاسف انها تخليك تهدي وتدعس عكس الدايري سرعة شبه موحده

- احيان يهزك الشوق للزرزره وتشتاق تسمع صوت الكت باك

عقدت العزم وقلت توكل على الله وتحد نفسك يا ولد وشوف هي تجربه ونوع من ضبط النفس ومنها تشوف هالكلام صحيح ولا كلام فاضي..

من بكره عبيت السياره ولقيت الرنج للكيلوات ٥٢٠ كيلو وقلنا بسم الله..

مشيت بهداوة وخليت الموتر ياخذ راحته وقلنا امر الله من سعه الركاده زينه..
غيرت خط الدوام وصرت اروحله من الدايري واستخدم المخارج لقضاء احتياجاتي..
ماصرت اجلس بالسيارة وهي شغالة، واطفيها اذا كنت انتظر احد مواعده ولا اشغلها وانتظر الاهل لين يركبون معي، اذا احد جا شغلتها..
اتحاشى مناطق الازدحام واستغني عنها في المشاوير القريبه (مسجد، بقاله، مغسلة)..

مرت ٦ ايام ونزل الافرج ل10.2 وكان البنزين على نهايته ( عادة اعبيها كل ٤ ايام فل)، عبيتها وكان الرنج ٦٥٤ كيلو، قلت اهلا وسهلا حي ذا الشوف هههههههههههه..

وقلت ياولد ليش ما انزله زياده (طمعت) وابن ادم لا انجز شي وده يسوي شي افضل منه..

ومشيت على نفس الخطوات لكن بدقه اكبر وبعد اسبوع بالزبط رحت افلل السيارة وكان الافرج وقتها 9.4 وعبيت وكانت المفاجأه وصلت معي الكيلومترات لفوق ال700!!

قلت عز الله بيضتي الوجه ٤ سلندر ماسوتها، هنا عابطت نفسي وقلت ابنزلها زوووود ( الموضوع صار تحدي) ووقتها بصراحة نقدت على نفسي لأني صرت غثيث بالسواقه وامشي مشي السلاحف على اساس اوصل الرنج لل7لتر وفعلا وصلت اقصى شي 7.9 وهذا كان فعلا انجاز ولله الحمد والكيلو طلع فوق ال٨٠٠ وعليها..

طبعا فيه صور مرفقه للاثبات وهذا ان دل ياجماعة الخير فهو دليل على ان ال ٨ سلندر انظلم بحجه انه مايوفر وكل ما جاء شخص يعرض موتره قالوا له البنزين غالي وبكم تعبيه ..

والحقيقة ان ال٨ سلندر مرتبط بقيادتك كشخص وهذا لايلغى ان السيارات ال٤ سلندر معناتها مو اقتصادية، لكن ال٤ سلندر مايوفرلك بنزين مثل مايوفر ال٨ سلندر لسببين:

- تانكيها صغير مقارنة بال٨ سلندر..
- حجم مكينتها وقوة التورك والعزم يتطلب ان الافرج يكون فوق ال١٠ عشان تتسارع السيارة وتثبت ع السرعه العالية عكس ال٨ سلندر يشيل نفسه..

لي تجربة بكورولا ٢٠١٥ والنترا ٢٠١٧ فلهم حول ٦٤٣ كيلو وحاولت اطبق فيه هالطريقه عشان ازيد وابت ورفضت الكورولا ان الافرج ينزل عن ٧.٤ وابت ورفضت الالنترا ان الافرج ينزل عن ٨.٢ لكن لايعني ذلك انهم مش اقتصاديات لكن لها اليه معينه تمشي عليها لانها صممت كذا..

طبعا انا رجعت ومسكت العصا من النص بالنسبة للتشارجر لا اسراف ولا غثاثه، وصار الافرج مابين ٩.٧ ل١٠.٥ وفلها ٦٨٠ كيلو ويالله لك الحمد..

اتمنى ان التجربه اعجبتكم ووثقت لكم المنطق والحقيقه وبالنهاية البنزين غالي لل٤ سلندر ولل٨ سلندر سيم سيم ماكو فرق..

لكن هل ال٤ سلندر قادر يوفر؟؟










إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


ي رجال الالنترا على الخط بسرعه معتدله معدلها تقرببا يتراوح بين 4 ونص الى 5 ونص مكينه 2.0

ابت منين جات


up 0 down 5
7amood1930 300
قبل 6 شهر



اخوي 7amood1930
انا كلامي جوا المدينة مو على الخط، والالنترا على الخط تثبيت سرعة ماتتجاوز ٦ بس الافرج ماينزل عن ٨.٢ بتجربتي وانا اخوك، واذا عندك تجربة نزلها بموضوع بالصور لاهنت..

اما سؤالك بخصوص (أبت منين جات)

فهي جت طالع عمرك من اول مطلع القصيد الي يقول (أبت الحماقه أنا تفارق أهلها)..


up 6 down 1
أبو بانا 307
قبل 6 شهر



وعليكم السلام
حقيقة الامر مسالة الرينج في السيارات هذه من غير فايدة من وجهة نظري
تبي العلم الأكيد
عبي فل وصفر العداد
لين ما تشتغل اللمبة ثم شوف كم مشتك
السيراتو تكتب لك 670 وتمشي 470 >_<


up 5 down 0
mohammad saeed 2863
قبل 6 شهر



مشكور عالموضوع الجميل وفعلا كثير من الناس غيروا نمط قيادتهم 

بس فيه ناس الله يهديها صارت تدبي 

اركب مع واحد من اخوياي ومعه اكورد يعني سياره موفره 

يمشي ع الهاي واي ٨٠ 

ودك تسطره خخخخ يعني قلنا وفر بس مو لهالدرجه مع العلم ان وضعه المالي زين 


up 1 down 0
m7md 33 644
قبل 6 شهر



وش الفايده اجل من قوة المكينه وانت تستخدمها استخدام كأن معك ٤ سلندر ماعطيتها حقها ههههههههههه امزح امزخ
اتفق من محمد سبيد طبلون السياره كلام فاضي
سيارتي وانا واقف بالمحطه معبي يعطيني ٦٠٠
لكن اصفر العداد عشان اتأكد يطلع ٥٠٠كيلو هذا بدون مكيف وسواقه وسط شبه حاره
بس اتوقع الامريكي طبلونه دقيق اكثر من الياباني والكوري
يعني الي يكتبه الطبلون بيكون قريب جدا من الصحيح
بس امريكي عن امريكي يفرق
يبيلك تجرب وتصفر العداد حق الرحلات
وماشاءالله صرفية ممتازه


up 2 down 3
d7ooom777 428
قبل 6 شهر



ال٤ سلندر مايوفرلك بنزين لسببين
الاول ان حجم التانكي صغير مقارنة بال ٨ سلندر... عزيزي نظريتك غلط
حجم التانكي ماله علاقة بتوفير الوقود، يعني مافي وحدة قياس هنا، مثل اللي يقول سيارتي اقتصادية الفل يمشيك اسبوع!!! بدون اي حسابات ولا وحدة قياس علمية. 
ثاني شئ حجم سيارات سيدان مثل السوناتا و الكامري والاكورد تقريبا كلهم ٦٨ لتر ويعادل ١٧ جالون امريكي. وهي سعة قريبة رغم ان التشارجر القديم سعته أكبر من الجديد وهذا من موضوع احد الشباب هنا( على باله انها صارت اقتصادية وكان فاهم غلط) 
ثالث نقطة ان بالعكس خلينا نقول ان التانكي يأخذ ٩٠ لتر هذي تقريبا حول ال٨٠ كيلو وزن في السيارة بما يعني كأن معاك راكب طول الوقت وهذا يحتاج مجهود اعلى من المكينة. 
—-٠٠٠٠٠٠٠٠٠٠٠
الموضوع الثاني/ لو انت طبقت نفس خطواتك لتوفير البنزين اللي انت ذكرتها على سيارة ٤ سلندر هل بتوفر أكثر من ال٨ بفرق كبير ولا لأ؟ 
ذكرت ان ال٤ تحتاج معدل استهلاك فوق ال١٠ علشان تتسارع لين تثبت..كلامك صحيح رغم انه يختلف من سيارة الى اخرى ولكن بعد ماتوصل السرعة المطلوبة يرجع معدل الاستهلاك طبيعي. صح؟ اما ال٨ في نفس ظروف القيادة استهلاكها المعدل دائما أعلى. 
في حالة واحدة هي اللي تكون فيها ال٨ افضل...لما تثبت على ١٦٠ كم مثلآ و سيارة ٤ سلندر مثل الصني بنفس سرعتك ومسافة سفر هنا صحيح تبدأ الصني تستهلك بسبب الجهد العالي على المكينة و فرق سرعات القير ...الخ 


up 4 down 0
dell2012 757
قبل 6 شهر



موضوع جميييل ويعطيك الف عافيه بس ...ماابي احبطك لكن....اذا تسمح لي يعني.......
كل كلامك والتجارب ووو الخ راح تتحطم
اذا ارتفع البنزين الى ٤ ريال للتر :))))))
اسف
الحقيقه موجعه ...الله يعين الجميع


up 1 down 4
midnight_963 524
قبل 6 شهر



انا جربت مسكت خط بالتشارجر ٢٠١٤ ٨ سلندر امشي ١٢٠-١٣٠ 
من الجبيل للرياض طبعا الي معي القير ٥ نمر وصلت و باقي حول نص التانكي بس بدون اي دعس 
رجلي خفيفة و مثبت السرعة فما بالك في التشارجر الجديدة ٨ نمر 
لاكن دخل المدينة طبيعي ٨ بيصرف كثير بسبب الزحمات و الاشارات وتوقف و تمشي و رجلك مهيب ثابته 


تجربة حلوه وواضحه من وجهة نظرك لكن اسمح لي بتعديل بسيط فيها

السيارة تقريبا 65 لتر إذا 683 تقسيم 65 يعطي 10.5كيلو/ لتر .
100 تقسيم 10.5 يعطيك 9.52 لتر لكل 100 كيلو حسب قيادتك .

طبعا الشاشة ذكرت لك ان المعدل هو 7.9لتر لكل 100 كيلو معناها اللتر يمشيك 12.65كيلو
نضرب 12.65كيلو * 65 لتر حجم التانكي يطلع 822 كيلو وهذا المفترض تمشي سيارتك لو كان الرنج 7.9 صحيح .




up 1 down 0
abofarah 956
قبل 6 شهر



بحكم خبرتكم 
ايش يعني الرينج والافرج ؟ 
أنا عندي مازدا اذا عبيتها فل يطلع الرينج ٩٥٠ تقريبا هاذا التقريبي انا ابغا بالضبط كم تمشيني ؟ 
والافرج ٧.٩ 
ياريت توضحون ونستفيد منكم 


up 0 down 0
king 191919 -10
قبل 6 شهر



الرينج هو مدى لممشى بالكيلو مثلا فل السيارة الفلانية ب 70 ريال يمشي 700 كم مثلا هذا هو الرنج اللي يقصده الاخ والافرج هو متوسط اللترات لكل كيلو هنا الاخ استطاع تحقيق 7.9 لترات لكل 100 كيلو على سيارة 8 سلندر وهذا انجاز يحسب له ولسيارته , الاخ ميد نايت لا اعتقد ان البنزين سوف يرتفع عن ريالين لعدة اسباب اولا هنا اكبر مصدر للنفط ورفع السعر يكون على اساس التصدير وليس الاستيراد زي الامارات بالضبط , لما اللتر يصير ب 4 ريال معناه اصبحنا مثل لبنان والاردن والمغرب وتركيا, سياسة تسعير عللى اساس الاستيراد لان في الاستيراد بيدخل عوامل مثل الاستيراد والشحن والتوزيع والتامين والنقل والضريبة وهذا معظمه مو بعندنا , هدذه توقعاتي وامنياتي ان تبقى الاسعار كما هي ورمضان مبارك عليكم جميعا


والله الصرفيه كويس
انا معي ماركيز 2006
بالمدينه 12-16/ 100كيلو
باخط 9-11/ 100


up 1 down 0
faisal0 0 236
قبل 6 شهر



انا وصلت افارج الى 5 بالزبط معي اكسنت 2017 cvt بس خليت سواقتي غثيثه


up 0 down 0
mohammed1368 64
قبل 6 شهر



اذا معتدل من ٧ الى ٧.٨ اذا ادعس ٨.٧ اذا راعي زرزره وحرق سياره عاد ذا شيء ثاني يخرب مكينه


up 1 down 0
mohammed1368 64
قبل 6 شهر



كم سعة التنكي بالتشارجر وكم بالكورلا واالنترا ؟؟


up 0 down 0
300
قبل 6 شهر



انا عندي الفكتوريا 2011 في داخل البلد 10.5/ 100 كيلو
وفي الخطوط وايام البرد توصل الى 100/8.5 الحمدلله


انت صدقت بكل كلمه وانا نفسكككك دايم ازر الموتر 
واحيان تمسك معي يوم اشوف انه ١٤ ولا ١٥ تحدي بيني وبين نفسي اخليه تحت الـ ١٠ 
وفعلا التشارجر او الثمانية سلندر انت اللي تتحكم فيه انه يصرف او لا 
على حسب الله يكرمكم رجلك 
وانت ياراعي الموضوع ماقصرت وكلامك صحيح ١٠٠٪؜١٠٠ 
وعن تجربه 


up 2 down 0
chgowob 2
قبل 5 شهر و أسبوع